Альберт Узденов Къарачай

Текст песни "Альберт Узденов — Къарачай"

Музыка Маджита Ногайлиева, стихи Альберта Узденова.

Алан халкъны аслан кёллю баласы,
Тау намысны оюлмазлыкъ къаласы,
Хар не тюрлю хазнадан да джеринг бай,
Акъыл сёзлю, дугъум кёзлю Къарачай!

Тау башлада эримеучю къарынгы,
Субай санлы джашил наратларынгы
Тоялмайма кёзлерим бла ийнакълай,
Акъ башлыкълы, джашилчепкен Къарачай!

Алма терек чакъгъан кюнде, эшикде
Джукълаб тургъан балачыкъны бешикде
Тылпыуундан тогъугъанча, мен алай
Солуучанма тау хауангы, Къарачай!

Таудан саркъыб, кёкге чыгъыб, джауарыкъ,
Ахыр кюнде санларымы джууарыкъ,
Сууларынгдан, мен ичеме тоялмай,
Ана кёлча таза суулу Къарачай!

Саным сени топурагъынга къошулур,
Джаным сингиб тау хауанга, хош болур,
Аджалым да айырмазча, мен алай
Байланыбма сеннге, шыйых Къарачай!

Кёзбау сёзге сен бёлдюртме эсинги ,
Сакъла, сакъла, Шам Къарачай, кесинги!
Сюргюнде да болмагъанды кёлюнг сай,
Ата Джуртум, ана сютюм - Къарачай!

Керек болса амалчы бол , сен алай,
Терк бюгюл да дженгил тюзел мычхылай,
Кес зорлукъну, сен ашыкъмай, бек чыдай,
Хаман джылы болсун юйюнг, Къарачай!

Намыс болсун джюрек хантынг, Къарачай!
"Бирлик"болсун ёмюр антынг, Къарачай!
Бай тилинги, хур дининги сакъла, джай!
Адам санынг минг къат ёссюн, Къарачай!
Адам санынг минг къат ёссюн, Къарачай!