Тыва Күлтегинниң кыйгызы

Текст песни "Тыва — Күлтегинниң кыйгызы"

Хостуг, чоргаар Тыва чонум кажан-даа даа, оо-оо-ой,
Ховуларда каңмыыл ышкаш хадываңар, оо-оо-ой,
Чаңгыс дөстүг төөгүңерни утпайн, сактып, оо-оо-ой,
Чаңгыс холда салаалар дег демнежиңер, оо-оо-ой

Күлтегин мен! Оък боор сөстүг,
Күштүг кыйгым салып тур мен –
Түрүк чоннар түревезин,
Түмен чылдар түрлүг чорзун.

Чүгүрүктүң маңы-ла ышкаш бодалывыс, оо-оо-ой,
Чүс-чүс чылды чаңгыс шак дег өттүр эртсин, оо-оо-хой,
Келир өйже сорулганның согуннарын, хоо-оо-хой,
Кезээде-ле чазыг чокка-й адып чоруул, оо-оо-ой

Күлтегин мен! Оък боор сөстүг,
Күштүг кыйгым салып тур мен –
Түрүк чоннар түревезин,
Түмен чылдар түрлүг чорзун.

Шаптылавас хылыш ышкаш тура-сорук, оо-оо-ой,
Шаптыктарны чаза-булгап эрттип чорзун, оо-оо-хой,
Сүт дег аккыр сеткиливис мөңге шагда, хоо-оо-хой,
Сүлде-тук бо мурнувуска киискип чорзун, оо-оо-ой.

Күлтегин мен! Оък боор сөстүг,
Күштүг кыйгым салып тур мен –
Түрүк чоннар түревезин,
Түмен чылдар түрлүг чорзун.