Омар Отаров и Зоя Алтуева Кёгала

Текст песни "Омар Отаров и Зоя Алтуева — Кёгала"

Музыка Маджита Ногайлиева, стихи Азамата Суюнчева.

Джашла:
Кёкле тюбюнде, кёкбаш юйледе
Джашайды ариу Кёгала.
Экибиз бирге кюйюб барабыз,
Кёгала, санга тарала.

Кёгала:
Кёкле тюбюнде, кёкбаш юйледе
Мен бек къайгъысыз джашаеем,
Тойгъа-оюнга къошулмай эдим,
Мен сюймекликден ташаем.

Джашла:
Джарыкъ джулдузча, сени сыфатынг
Къууат салады шахаргъа,
Ышаргъанчыгъынг, ала кёзлеринг
Къоймайла бизни джашаргъа.

Кёгала:
Бизни тийреге сиз тойгъа келиб,
Юйде олтутуруб кетдигиз,
Бирден кёзюме къараб ышарыб,
Мени тынчлыкъсыз этдигиз.

Джашла:
Субай санынга ариу джарашхан
Кёк бетли чепкен кийесе,
Экеулен болуб сени сюебиз,
Сен къайсыбызны сюесе?

Кёгала:
Экигизге да бир сёзюм джокъду,
Джашла, сиз ашхы, аламат.
Халал тенглени шохлугъун бузсам,
Не айтыр манга джамагъат?

Джашла:
Экибиз бирге аллынга келдик,
Бир-бирибизден уяла,
Халал тенглени харам этме да
Бирин сайлачы, Кёгала.

Кёгала:
Экигизни мен айырмайын,
Бирча багъалы кёреме.
Айыб этмегиз, тюзюн айтайым,
Мен башха джашны сюеме.