Роза Рыбакова Шайра кундемем

Текст песни "Роза Рыбакова — Шайра кундемем"

Шайра кундемем - Роза Рыбакова.
Мутшо - Алексей Александров-Арсакын.
Семже - Василий Очетовын.

Эр кечым саламлыше курык,
Кол модмым йӧратыше ер.
Сад вуйысо кайыкын мурым
Шып колыштын кийыше сер.
Умбалне Элнет ӱмбал канде,
Шурнаҥше пасу ончылнем.
Пеш ямле мемнан шочмо мланде,
Пеледше Шайра кундемем.

Тышан кайыквусо сӱаным
Ышта тӱтыраҥше эрден.
Тышан поро калык ешаҥын,
Ила пиалан ӱмыр ден.
Эрта корныеҥ - пурта налын,
Пураж ден сийлен ужата.
Пайремым ыштат уло ял ден,
Сӱан шым Шайрам тарвата.

Тышан пиалан шочынам мый,
Нур шудо шепкам алмаштен.
Мурен мылам кайык авам гай,
Ачам гай ончен ял куштен.
Пӱртӱс деч моторлыкым налын,
У илышын сынжым аклен,
Шайра кундемем, шочмо калык,
Тылат шӱм мурем пӧлеклем.